Bonggang 2014 Palarong Pambansa, ihahanda ni Governor ER Ejercito

Hindi lamang handa na ang Probinsiya ng Laguna kundi itinakda pa nila ang isang makulay at iba’tibang aktibidad patungo sa opisyal na pagbubukas ng pinakahihintay na 2014 Palarong Pambansa na magsisimula bukas hanggang Mayo 10.

Bakas ang kasiyahan sa mukha ni Laguna Governor ER Ejercito sa binitawang pananalita sa pagsisimula ng aktibidad sa Activity Center sa SM Calamba bago ang opisyal na pagbubukas ng Palaro kung saan ay itinuring nitong makasaysayan at kakaibang karanasan ang mararanasan ng mga kalahok at opisyales ng 17 rehiyon.

“Ikinagagalak ko po na sa unang pagkakataon ay maisagawa sa lugar mismo ng ating bayaning si Gat. Jose Rizal sa Laguna na ngayon ay isiniselebra ang ika-100 taong pagkakakilala sa probinsiya. Isa po itong malaking oportunidad sa amin na maipakita sa buong bansa ang kagandahan ng aming probinsiya,” sinabi ni Ejercito.

Idinagdag ni Ejercito na inihanda na ng Laguna ang pinakamakulay na pagtatanghal para sa 11,200 atleta at 1,200 technical official na mula sa 17 rehiyon kung saan ay masasaksihan ang kabuuang 27 sports event, 4 na demonstration sports at 2 special games.

“We had prepared many things for the delegates and we are confident that this week of sporting event which is the Olympics in the Philippines is one for the history books,” pagmamalaki ni Ejercito.

Isasagawa sa Lunes (Marso 5) ang opisyal na pagbubukas ng torneo kung saan ang dating pangulo ng bansa at tiyuhin ni Ejercito na si Manila Mayor Joseph Estrada ang makikiisa sa Palaro, bukod pa sa makikibahagi rin si Sarangani Congressman at 8-time world boxing champion Manny Pacquiao.

Nabatid pa kay Ejercito na magbibigay ng pananalita si Pacquiao na ‘adopted son’ ng Laguna dahil sa may bahay ito sa Biñan at ang mga anak ay nag-aaral sa Brent School, gayundin ang tiyuhin nito na si Estrada.

Dadalo rin ang unang Olympics ice skater na si Michael Martinez, dating Palarong Pambansa swimmer na si Enchong Dee, PBA star na si James Yap at ang anak ni Ejercito at team captain ng La Salle athletics team na si Jericho Ejercito na kabilang sa limang magsisindi ng ilaw sa Palaro.

Simbolikong mag-iilaw sa relay run si Martinez na ipapasa nito kay Dee patungo kay Yap na siyang magpapasa kay Ejercito. Si Ejercito ang magbibigay ng sulo kay Pacquiao na siyang magsisindi sa torch na maghuhuhudyat sa pagbubukas ng ika-57 edisyon ng torneo para sa mga mag-aaral sa elementary at high school.

Bago ang pagbubukas ng torneo ay opisyal ding pasisinayaan ang pinakamalaking monumento ni Rizal sa loob mismo ng Laguna Sports Complex na may taas na 26 na piye at may bigat na 20 tonelada. Ang monumento ay nagpapakita kay Rizal bilang isang eskrimador.

Si Rizal ay isa ding pistolero, judoka, jia-jitzu at boksingero. 

Kinuha din ng Laguna ang serbisyo ng PLDT Home DSL sa tulong ni Gary Dujali upang siyang maging opisyal na tagadala ng komunikasyon ng Palaro sa internet at maging sa mga mamamahayag na magkokober sa Palaro. 

Source link:  http://www.balita.net.ph/2014/05/02/bonggang-2014-palarong-pambansa-ihahanda-ni-governor-er-ejercito/