Kaligtasan sa Palarong Pambansa 2015, siniguro ni Mayor Duterte

Tiniyak ang kaligtasan ng mga delegado at panauhin sa paglarga ng Palarong Pambansa 2015 kung saan ay klinaro nila na walang anumang bantang magaganap upang guluhin ang Palaro sa Mayo 3 hanggang 9 sa Davao del Norte.

Siniguro ni Regional Peace and Order Council 11 Chair Mayor Rodrigo Duterte ang mapayapang pagdating ng mahigit sa 15,000 mga atleta at bisita mula sa iba’t ibang panig ng bansa na dadalo sa national games na halos isasagawa mismo sa Davao del Norte Sports and Tourism Complex sa Tagum City sa lalawigan na ito.

Sa ginanap na pagpupulong ng RPOC-11 sa siyudad, ipinahiwatig ni Duterte na ang threat level sa week-long Palaro ay tanging 3 lamang sa scale na mula sa 1-10, na ang 10 ay ang pinakamataas na level ng pagbabanta.

Subalit sinabi ng RPOC-11 chair na inimplementahan na niya ang maximum security measures bagamat tinuran nito na mababa ang level ng pagbabanta.

“The reaction of government is always the same be it 1 or 10 ang security threat. I expect nothing but I am prepared for everything,” pahayag ni Duterte.

Nanawagan din siya sa New People’s Army at iba pang armadong mga grupo na lubusang lumayo sa kasagsagan ng Palaro.

Subalit siniguro ni Duterte na kung mayroong mang mangyayaring pagbabanta, hindi ito manggagaling sa hanay ng NPAs, na aniya’y ‘di gawain ng grupo na magsagawa ng gulo lalo pa at may malaking kaganapan sa lalawigan.

Ipinangako rin ng mayor na ang Davao City ay magkakaloob ng seguridad at medical support, bukod pa sa nakalaan na P1-million financial sponsorship na agad nang inihanda ng Davao del Norte, na ang layunin ay sadyang makatulong sa ikatatagumpay ng Palaro.

Ang pagiging punong-abala ng Davao del Norte sa 2015 edition ng pinakamalawak na school-based games ay suportado ng Tagum Agricultural Development Company Inc. (TADECO), Damosa Land, Davao Packaging Corporation (DPC), Davao International Container Terminal, Inc. (DICT) at Pearl Farm Beach Resort.

Pinasalamatan naman ni Governor Rodolfo del Rosario si Duterte dahil sa pagkalinga nito sa Palaro, partikular na sa inihandang plano para sa kaligtasan ng mga delegado at bisita sa national games.

“I am personally at ease that we will be able to provide unparalleled safety to everyone,” pahayag nito na aniya’y napakalaking kaluwagan para sa lalawigan. “With the backing of the whole Davao Region, there is no reason for us to fail.” 

 http://www.balita.net.ph/2015/04/23/kaligtasan-sa-palarong-pambansa-2015-siniguro-ni-mayor-duterte/